11 сентября 2026 г. 11:09
🖼Фото · 10 шт.
O‘zbekiston va Eron Sport vazirlarining uchrashuvi bo‘lib o‘tdi
O‘zbekiston Respublikasi Sport vazirligida sport vaziri Adkham Ikramov hamda Eron Islom Respublikasi Sport va yoshlar ishlari vaziri Ahmad Dunyomoliy boshchiligidagi delegatsiya vakillari o‘rtasida rasmiy uchrashuv bo‘lib o‘tdi.
Do‘stona va konstruktiv ruhda o‘tgan muloqotda Adkham Ikramov tomonidan mehmonlarga Davlatimiz rahbari tashabbuslariga muvofiq mamlakatimizda keyingi yillarda sport sohasini tizimli rivojlantirish va soha infratuzilmasini tubdan yangilash borasida amalga oshirilayotgan keng ko‘lamli islohotlar xususida atroflicha taqdimot o‘tkazildi.
Muzokaralar davomida Eron tomoni O‘zbekistonning keyingi yillarda jahon sport maydonlarida qo‘lga kiritayotgan ulkan yutuqlarini yuqori baholadi.
Uchrashuvning eng muhim voqeasi sifatida O‘zbekiston Respublikasi Sport vazirligi va Eron Islom Respublikasi Sport va yoshlar vazirligi o‘rtasida hamkorlik to‘g‘risidagi Anglashuv memorandumini amalga oshirish bo‘yicha 2026-2027 yillarga mo‘ljallangan Harakatlar rejasi rasmiy ravishda imzolandi.
Hujjatga muvofiq, ikki mamlakat sport federatsiyalari o‘rtasida eshkak eshish, og‘ir atletika, boks, kurash, stol tennisi, taekvondo, ushu, karate, qilichbozlik, shaxmat, futbol, dzyudo, gimnastika, suzish, o‘q otish hamda sport tibbiyoti yo‘nalishlarida o‘zaro yaqin hamkorlik yo‘lga qo‘yiladi.
Ushbu sport turlari bo‘yicha qo‘shma o‘quv-mashg‘ulot yig‘inlarini tizimli tashkil etish, ilmiy hamkorlikni yo‘lga qo‘yish hamda soha mutaxassislarining o‘zaro malaka almashinuvini faollashtirish yuzasidan kelishuvga erishildi.
Mehmonlar Davlatimiz rahbari tashabbuslari asosida bunyod etilgan muhtasham Olimpiya shaharchasiga tashrif buyurib, u yerdagi zamonaviy sport inshootlari va sportchilar uchun yaratilayotgan keng ko‘lamli sharoitlar bilan yaqindan tanishdilar hamda loyihaga yuqori baho berdilar.
Web-Sayt | Telegram | Facebook | Instagram | Youtube